7欖套票炒到七千

猪拉多纳

01/04/2012
文： 波男

上星期波男同幾個外籍朋友歡聚一堂，所為何事，咪又係一年一度嘅香港國際7人欖球賽咯。呢班專業人士平日瞄實大市，機關算盡，假日又玩得瘋狂，貫徹做得又玩得人生目標，7欖盛事，當然唔可以放過。

網上bid價真有人要

佢哋知波男喺體育界人面廣，舊年年尾已講定要飛。波男親身經驗，近幾年門票真係好搶手，晨咁早已向有關方面高層打針，講明要六張飛，除自己睇，仲要應酬一班豬朋狗友。以為坐定粒六，點知高層老友三月初來電，話今年撲飛狀況進入瘋狂境地，Lady GaGa香港演唱會仲有啲炒作味，但7欖就真係有價有市，幾貴都有人要。


波男幾經辛苦，大打高層人情牌，臨尾至撲齊六張，否則波男之名，從此掃地。之後上網睇番，門票搶手程度確實好誇張，三日賽事套票原價千五，網上bid價有三千，五千亦唔少，更誇張七千都見到。據主辦單位高層講，唔好以為係bid，真係有人要架！


冇法喇！7欖根本唔係睇波，同你萬聖節或聖誕節去蘭桂坊冇乜分別，都要狂歡、鬥high同睇靚女囉！