神戶死晒火搞唔掂鳥棲

猪拉多纳

31/03/2012
文： 九叔

香港足總董事會話下季港甲可能有一支日本企業球隊加入，其實日職、日乙球隊呢幾年都向外擴張，同好多亞洲地區嘅球隊合作，好似今日作客鳥棲砂岩嘅神戶勝利船，最近就同泰超嘅春武里握咗手嘞。

鳥棲開季主場未輸過

除咗响新加坡有隊新潟天鵝乙隊、日乙FC岐阜都同台灣體院成為盟友，神戶勝利船、大阪櫻花尋日同時宣布同泰超球隊合作，前者同春武里埋堆，後者就成為曼谷玻璃嘅合作夥伴，佢哋相互之間會响青訓、表演賽、教練培訓幾方面合作，假如香港都有呢啲日本職業隊肯派啲二隊嚟玩吓，個聯賽肯定熱鬧好多。


講番鳥棲對神戶場波，兩隊都响中游浮沉，計人腳名氣，神戶有伊野波雅彥、大久保嘉人呢啲國腳級人馬，點睇都四正過鳥棲，不過講近況兩隊就剛啱掉轉，鳥棲聯賽加盃賽兩連勝、神戶就兩連負，仲要一粒都入唔到，論狀態明顯就比唔上對手，所以神戶以前作客雖然未輸過畀鳥棲，但係主隊今季3次主場出擊不敗，取得2勝1和，平手盤冇理由唔博鳥棲啫。（now633及660台周六晚6：00直播）