曼城無敵主場開殺戒

猪拉多纳

31/03/2012
文： 江忠德

英超剩番8輪，邊隊係名列前茅，邊隊降班收場，好快就有分曉，一班戰將想留低定起身走人，就靠呢段時間盡顯身價，曼城球星個個薪高糧準，係時候「晒冷」，主場對踢到殘晒嘅新特蘭要大開殺戒！（有線200、300及廣東體育周六晚10：00直播）


曼城領隊文仙尼同一班戰將坐埋一條船，去到呢個關鍵時刻，又豈能獨善其身？曼城近期作客衰到貼地，結果畀紅魔趕過，雖然依家形勢嚴峻，但陣中又有邊位球星未經歷過大風大浪？今鋪返到無敵主場絕對經得起考驗。

新特蘭踢完足總盃輸體力

作為豪門班霸，曼城能夠喺季尾齋攻聯賽確係罕見，冇得用疲憊做藉口，以佢地雄厚嘅班底，仲要主場平均每場攻入近3球，實在搵唔到理由炒唔起「黑貓」。


新特蘭領隊奧尼爾一直好有辦法對付強隊，但係早前要分心足總盃，加上搶夠分護級之後，近況好明顯回落，周中喺足總盃同愛華頓激戰之後體能成疑，造訪主場長勝嘅曼城只能輸少當贏。