希堡誓破衞冕魔咒

猪拉多纳

31/03/2012

有邊個會估到，希爾星堡踏入「後軒歷拿臣時代」愈踢愈好，上季更加歷史性成為三冠王，不過睇番往績，原來瑞超近8季從未有球隊試過冧莊，加上列強今季都加碼，希堡响新球季要打破衞冕魔咒睇嚟唔易！


瑞典名將軒歷拿臣06年重返希爾星堡，希望喺自己職業生涯晚期，再幫母會奪瑞超冠軍，可惜打咗3季都只係喺06年幫球隊捧得一個瑞典盃冠軍，09年黯然退役。冇咗呢名射手，好多人都覺得希堡想奪標更難，點知佢哋用咗兩年時間，上季就事隔12年後再喺瑞超封王，仲要威到再衞冕埋瑞典盃兼擸埋瑞超盃，成為瑞典史上首隊三冠王。

近8季冇球隊試過冧莊

今季希堡保留大部分主力，結果上個禮拜又喺瑞超盃憑前鋒保奧辛梅開二度，以2：0擊敗AIK蘇納封王，不過希堡今季想衞冕瑞超唔易，事關自佐加頓斯喺03年成功衞冕後，近8季再冇球隊可以再冧莊，而且當中只得馬模攞過2次冠軍，可見呢個聯賽競爭非常大。


事實上，為咗挑戰希堡，瑞超列強今季都大事增兵，特別係瑞超傳統「Big3」哥登堡、AIK蘇納同馬模。哥登堡單係買奧雷布洛中場謝斯就用咗85萬歐元（約875萬港元）；AIK蘇納就簽得近年喺挪超有出色表現嘅哥斯達黎加射手施素波格斯；至於啱啱以1,240萬歐元（約1.3億港元）資產成為本年度瑞典最富有球會嘅馬模，就由希堡搶得新星西蒙菲恩，預期今季瑞超將會七國咁亂。

瑞超近8季冠亞軍

年份 冠軍 亞軍


2011 希爾星堡 AIK蘇納

2010 馬模 希爾星堡

2009 AIK蘇納 哥登堡

2008 卡爾馬 艾夫斯堡

年份 冠軍 亞軍

2007 哥登堡 卡爾馬

2006 艾夫斯堡 AIK蘇納

2005 佐加頓斯 哥登堡

2004 馬模 咸史達斯

希爾星堡上季排名：1

上季成績：18勝9和3負‧入55球失27球

孭飛球星：辛甸、艾特文、艾費特芬保加臣

簡評：瑞典史上首支3冠王，剛再奪瑞超盃，後衞馬古斯賀格臣離隊，借得冰島新星前鋒艾費特芬保加臣，保持爭標競爭力。奪標賠率：5.50倍

AIK蘇納上季排名：2

上季成績：18勝4和8負‧入46球失27球

孭飛球星：艾文佩臣、梅度巴、施素波格斯

簡評：上季中賣走兩名主力仍以亞軍衝線，今季簽得近年喺挪超有出色表現嘅施素波格斯，具備奪標本錢。奪標賠率：9.00倍

艾夫斯堡上季排名：3

上季成績：18勝3和9負‧入52球失32球

孭飛球星：拉斯尼爾遜、大衞伊姆、侯爾特

簡評：上季大熱倒灶，今季改由連拿特臣執教，成功留用大部分主力，包括被譽為「新龍格保」嘅侯爾特。奪標賠率：4.00倍

馬模上季排名：4

上季成績：15勝9和6負‧入37球失30球

孭飛球星：威靈頓、艾歷費貝治、西蒙菲恩

簡評：剛以1,240萬歐元資產成為瑞超最有錢球隊，今季有新進國腳艾歷費貝治回流，兼簽得超新星西蒙菲恩。奪標賠率：4.50倍

加爾斯上季排名：5

上季成績：16勝3和11負‧入47球失34球

孭飛球星：杜卡莫、巴桑班治、伊積

簡評：上季射入14球嘅施歷克離隊，幸成功留用核心杜卡莫，而且簽得伊積同奧比恩兩名老將，仍有力左右大局。奪標賠率：34.0倍

赫根上季排名：6

上季成績：14勝7和9負‧入52球失32球

孭飛球星：馬干迪利、艾迪靴南迪斯、馬田艾歷臣

簡評：今季借得洪都拉斯新進前鋒艾迪靴南迪斯同兩位艾夫斯堡球員，實力加強，應有能力繼續企穩中游位置。奪標賠率：21.0倍

哥登堡上季排名：7

上季成績：13勝6和11負‧入42球失34球

孭飛球星：希臣、謝斯、法拿魯特

簡評：今季改由米高史達爾執教並大事擴軍，花費85萬歐元簽得瑞典新進國腳謝斯等5名新兵，季前賽表現對辦獲3勝3和。奪標賠率：4.50倍

卡爾馬上季排名：8

上季成績：13勝5和12負‧入39球失34球孭飛球星：伊斯列臣、莊拿芬麥當奴、柏巴迪奧夫

簡評：今季大換血，簽得哥斯達黎加入球機器莊拿芬麥當奴同塞內加爾新貴柏巴迪奧夫等多名潛質新星，活力大增。奪標賠率：17.0倍

加費萊上季排名：9

上季成績：10勝11和9負‧入31球失39球

孭飛球星：達爾保、奧路夫、奧里莫

簡評：成功保留上季合共射入18球嘅達爾保同奧路夫呢對前鋒組合，配合由佐加頓斯加盟嘅前瑞典國腳奧里莫，火力有保證。奪標賠率：101倍

米贊比上季排名：10

上季成績：12勝4和14負‧入33球失39球

孭飛球星：艾堅貝治、拿迪特甸納、基胡胡

簡評：上季射入8球嘅射手盧夫基斯離隊，基胡胡等新球員大多以借將身份加盟，完全欠缺歸屬感，隨時捲入降班漩渦。奪標賠率：67.0倍

佐加頓斯上季排名：11

上季成績：10勝6和14負‧入36球失40球

孭飛球星：伊保拿尼基、杜維奧、列卡度山度士

簡評：今季簽得卡爾馬箭頭列卡度山度士，加費萊中場尤斯夫捷比沙等幾名富經驗球員，料戰績有所提升。奪標賠率：21.0倍

奧雷布洛上季排名：12

上季成績：11勝3和16負‧入36球失45球

孭飛球星：華迪拉馬、魯殊特古、丹尼爾班保

簡評：上季中流失多名主力後實力大跌，正選門將艾夫巴治亦告離隊，加上射手包連奴因合約問題被雪藏，恐有降班危機。奪標賠率：21.0倍

諾高平上季排名：13

上季成績：9勝7和14負‧入32球失49球

孭飛球星：科華迪臣、夏辛尼

簡評：為脫離下游位置，今季積極增兵，包括羅致波琴中場安達亞斯祖漢臣同盧森堡國腳拿斯高治，要再留級唔難。奪標賠率：67.0倍

西里安斯卡上季排名：14

上季成績：8勝4和18負‧入27球失44球

孭飛球星：杜馬、阿加洛域、真高

簡評：上季贏出護級附加賽僥倖保住超聯席位。今季簽入兩名波斯尼亞球員及敍利亞國腳真高，望以聯合國軍團殺出血路。奪標賠率：201倍

阿達維貝治上季排名：甲1

上季成績：18勝3和9負‧入58球失31球

孭飛球星：馬奴斯艾歷臣、奧斯卡慕拿、奧利奧利

簡評：闊別一季後再度升上瑞超，留用大部分升班功臣，並加入上季為挪超史達比克射入7球嘅奧利奧利，或者有驚喜。奪標賠率：101倍

辛斯華爾上季排名：甲2

上季成績：16勝7和7負‧入61球失29球

孭飛球星：賀斯達、科斯貝治、希治

簡評：自08年後再次征戰瑞超，上季射入13球嘅安布隆已被AIK蘇納回收，新加盟球員大多係棄將，被視為降班大熱。奪標賠率：101倍