利赫高保衞柏林圍牆

猪拉多纳

31/03/2012
文： 蘇斯黑柴

周六德甲尾場哈化柏林主場迎戰禾夫斯堡，排緊尾二嘅哈化柏林護級勢危，餘下7輪賽事場場當決賽踢，好在73歲老帥利赫高已獲高層信任，放手畀佢揸旗，今晚難得對住一向畀佢哋恰死嘅禾夫斯堡，係搶分黃金機會，平手盤必捧哈化。


（有線61及64台周日凌晨零時30分直播）


堂堂首都球會，哈化淪落到如斯田地，總經理派列斯要負上好大責任，除咗理財不善搞到球會債務纏身外，佢喺管理方面亦一塌糊塗，哈化上半季本來成績唔曳，但佢同教練巴布意見不合，最終巴布喺歇冬期離隊，下半季搵到務實嘅史基比執教，但佢上任後聯賽5連敗加埋德國盃出局，又迅速被炒，史基比離隊後投訴工作受到派列斯極大干擾，最終派列斯搵嚟利赫高，初頭成績都係一般，但上仗作客擊敗緬恩斯總算帶嚟希望，派列斯亦決定放權畀呢位傳奇老帥，希望佢可以喺劣勢下扭轉乾坤。

哈化往績食住禾堡

贏咗緬恩斯，哈化雖然仲排緊尾二，但只落後護級兵團漢堡、奧格斯堡、科隆同弗賴堡一至兩分，仲有大把機會逃出生天，今仗喜遇畀佢哋恰慣嘅禾夫斯堡，兩軍自2004年至今聯賽14次對壘，禾堡只係喺09年奪冠時主場險勝過一次，其餘13戰哈化取得8勝5和一面倒佳績，明顯格食格。禾堡近期雖然3連勝，但整體演出唔算叻，而且目前仍然係德甲作客成績最差球隊，加上聯賽位列中游，搶分意欲唔及救亡中嘅主隊，哈化唔使讓波當然值得捧場。