彭拿路背水戰擺「大」個頭

猪拉多纳

27/03/2012
文： 亨格比利

南美自由盃聽朝戰火重燃，H組嘅智利大學為搶3分爭上次席肯定搏命，弊在佢哋條防線穿晒大窿，對住背水一戰嘅彭拿路隨時出事，與其左度右度估贏輸，倒不如簡單啲敲個1.7倍入球大仲實際。（開賽時間：周三早上8:30）

智利大學防線穿窿

先睇H組形勢，智利大學暫時有4分排第3，但就比揸住5分嘅葛度爾古斯踢少場，今鋪只要攞晒3分就可以殺上次席，戰意唔使懷疑。之不過呢支智利勁旅人腳唔齊，守將馬高斯干沙利斯過檔法林明高之後，會方特登斥巨資羅致莫蘭迪頂佢個位，可惜呢位罰球專家今仗受傷缺陣，另一後衞亦都因為扭計離隊被雪，後防天殘地缺。


包艇嘅彭拿路輸波就即刻出局，教練佐治達施華已經講明即使作客都要攻，星級前鋒艾斯杜恩諾夫傷愈可候命，背水一戰肯定擺大個頭，同智利大學鍊過，睇個款呢場波唔慌少波入。


自由盃H組

賽制

32支球隊分8組進行雙循環分組賽，每組首、次名躋身16強淘汰賽。