皇馬眾星歸位 射爆尼科西亞泡沫

猪拉多纳

27/03/2012
文： 力奇

歐聯8強首回合今晚開火，打頭陣係由塞浦路斯嘅尼科西亞主場迎戰9屆冠軍皇家馬德里。早前突然跌Watt嘅「銀河艦隊」，上周末西甲及時回勇大捷振軍心，今仗佢哋仲會有比比同奧斯爾兩大攻守核心復出，誓要射爆尼科西亞嘅神奇泡沫！力奇認為皇馬可贏2球或以上，撐1.72倍「讓球客勝」！（有線62及202周三凌晨2：45直播）


「神奇球隊」尼科西亞今屆開創歷史，成為首支躋身歐聯8強嘅塞浦路斯球隊，士氣當然冇得彈。不過，佢哋想延續神奇之旅絕對唔易，事關佢哋喺分組賽及16強所遇到嘅對手，其實只係波圖、薩克達、辛尼特同里昂之流，同今戰皇馬根本係兩個級數，呢個所謂神奇泡沫，睇怕係時候爆破。

尼科西亞箭頭坐波監

事實上，尼科西亞今仗未能以最強陣容應戰，事關佢哋件射手、巴西籍前鋒古斯達禾文度卡坐波監，冇反撲入球能力，對住星光熠熠嘅皇馬，即使左閘威廉保亞雲杜拿趕及傷愈，但都睇怕只能夠全場捱打。

比比 奧斯爾抖夠搏殺

皇馬之前喺西甲兩連和的確令人擔心，但正所謂知恥近乎勇，上周末佢哋就喺巴拿貝主場大炒皇蘇5：1，一洗頹風。更好彩嘅係，當日皇馬對皇蘇有守將比比同進攻中場奧斯爾停賽，雙星抖夠今晚復出，必定會有更好發揮，即使「銀河艦隊」今仗有沙比阿朗素坐波監，狄亞拉同迪馬利亞續抖，都一樣冇有怕！


咪忘記一點，皇馬主帥莫連奴一向係歐戰高手，之前5次領軍出戰歐聯8強，次次都過到關，而且佢哋上輪16強首回合作客莫斯科中央陸軍，試過臨尾被逼和引嚟一場虛驚，吸收過呢次教訓，今晚去到塞浦路斯，皇馬絕對唔會再放生對手，唔贏夠2球又點會收手？

橫數千軍

尼科西亞遇鬥牛軍例衰

‧今屆主場7戰5勝。

‧歷來10戰西班牙球隊，僅得5和5負。

皇馬莫帥係歐聯專家

‧今屆賽事8戰7勝1和。

‧主帥莫連奴歷來5次領軍打歐聯8強均晉級。