飛鷹撲擊車仔！

猪拉多纳

27/03/2012
文： 巨高

葡超賓菲加與英超車路士，兩隊關係非比尋常，今屆歐聯八強首回合，雙方首度喺呢項歐洲頂級賽事對決，相信兩位車路士主力大衞雷斯及拉美利斯，今場都會本着「感恩」之情去對待舊球隊，對有「飛鷹」之稱嘅主隊賓菲加爭勝會有一定幫助，賓菲加讓平半，可捧上盤。（有線61及201台周三凌晨2時45分直播）


車路士一對巴西球員大衞雷斯及拉美利斯，以前都係賓菲加嘅骨幹，今日兩人可以喺倫敦球隊賺取高薪，全靠賓菲加嘅栽培，可以講兩位森巴兵都欠賓菲加一個大人情。今場重返成名之地盧斯球場，相信兩人感觸良多，未必可全心全意為車路士作戰。

森巴「雙斯」還人情

另方面，車路士看守領隊迪馬堤奧同球隊嘅蜜月期已過，最近兩場比賽先後面對熱刺及曼城都失分而回，氣勢明顯回落，好難期望「藍戰士」交番出歐聯上圈淘汰拿玻里嘅超卓表現。仲有一點要提出，就係車路士今季歐聯作客成績都幾差，對拿玻里輸一比三、對利華古遜輸一比二、對弱隊亨克都打和一比一，客戰賽績較差自然畀唔到球迷信心。


賓菲加今季主場賽事惡氣十足，強如曼聯都未能以客隊身份擊敗賓菲加，今次對車路士嚟講當然係一大考驗，況且車仔球員平均年齡偏高體力下降較快，經過兩場英超惡戰後或影響演出，故上盤較有把握。