皇馬盛細藏金

猪拉多纳

27/03/2012
文： 蘇豪

歐聯八強首回合，塞浦路斯蚊型球會尼科西亞主場挑戰西班牙班霸皇家馬德里，牌面係八強最強弱懸殊之戰，客勝熱至1.2倍已反映一切。不過，皇馬主帥莫連奴喺歐聯作客向來打穩陣牌，帶領皇馬於歐聯作客十戰七場開細，客W偏熱唔抵玩，改捧2.15倍細盤！（有線62及202台周三凌晨2時45分直播）


莫連奴帶隊打歐聯向來有自己一套，主場奉行喪攻主義，盡量爭取入球，作客則完全相反，只求搵個作客入球，甚至保持不敗已收貨，即使率領主攻型嘅皇馬，仍然保持呢種風格，今屆分組賽作客弱旅薩格勒布戴拿模小勝一球，十六強首回合作客莫斯科中央陸軍領先一粒，尾段冇谷前再爭取士哥，甚至以艾比奧爾入替奧斯爾專心助守，同主場踢法截然不同。

作客細率高 難炒尼科西亞

自從莫連奴於上季上任後，皇馬於歐聯作客十戰七場開細絕非偶然，其中有兩次開大係因為阿積士有前冇後打死罷就，可見若主隊都係穩守的話，細盤絕對手到拿來，兼且皇馬近期作客攻力跌Watt，近五場作客有四場僅入一粒咋！


皇馬中場重心沙比阿朗素今場坐波監，防中狄亞拉受傷缺陣，中場中路穿窿，或需搵法比奧干查奧或格尼路移入中路拍住基迪拉搶截，中場唔齊腳，莫帥更加會要求球員注重防務，盡量避免畀對手偷雞。


尼科西亞實而不華，陣中冇大牌球星，希臘門將捷奧迪斯上圈救出里昂兩個十二碼成為晉級功臣，現時信心爆棚。另外，主力文度卡要停賽，呢位中場佔尼科西亞七個歐聯入球其中三個，冇埋佢更加唔使諗，一於穩守博偷雞，預期皇馬頂盡小勝，必捧細盤。