拿玻里後顧無憂最抵錫

猪拉多纳

21/03/2012
文： 郭球奇

隨住歐聯出局，拿玻里嚟緊終於可以專心本土賽事，今晚佢哋喺意大利盃4強次回合主場對錫耶納，拿維斯同馬治奧呢對主力有望復出，對住有射手缺陣嘅錫耶納，球奇睇好拿玻里可以反勝晉級，捧1.9倍「讓球主勝」！（開賽時間：周四凌晨3:45）

錫耶納孭飛箭頭收咧

首回合嗰陣，拿玻里因為要兼顧歐聯，所以作客不敵錫耶納1:2，但今時唔同往日，拿玻里喺歐聯玩完，冇晒心理包袱，既然贏多場就可以殺入決賽，戰意唔使懷疑。前鋒拿維斯同後衞馬治奧之前對車仔搏盡受傷，缺席日前對烏甸嘅賽事，經過1場休息後，今晚應可復出，配合大勇射手卡雲尼，齋計火力已經贏晒。


對家錫耶納近況唔錯，佢哋班高層仲希望說服教練辛連奴續約，不過喺呢個關鍵時刻，射手卡拿奧喺前仗對切塞納重創，好大機會提早收咧。睇番錫耶納日前主場對降班膽路華拿，冇咗卡拿奧即慘吞兩蛋，今晚呢位意大利箭頭繼續缺陣，錫耶納想唔輸都難啦！


首回合：拿客負1:2

法總、德盃、荷盃及葡聯盃賽制

法總為8強戰，其餘3項賽事為4強戰，均以一場過分勝負，若法定時間內打成平手，則需加時作賽，再和則互射12碼決勝。

意盃賽制

採主客兩回合淘汰制，今輪為4強次回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊將憑作客入球優惠晉級，若加時沒有入球，則需互射12碼決勝。