慕遜加柏大駁火

猪拉多纳

21/03/2012
文： 麥馬拿仁

畀條數大家計，洛賓＋列貝利＋馬里奧高美斯＋馬高列奧斯等於乜嘢？答案係大量入球！德國盃四強好戲碼，Red Hot拜仁慕尼黑作客慕遜加柏。拜仁近三戰入廿球人都癲；慕軍亦有馬高列奧斯及時回勇，如此進攻卡士，點可以唔捧大？（無綫翡翠台周四凌晨3時30分直播）


拜仁早前曾經歷低潮，同「小豬」舒韋恩史迪加受傷缺陣有關，但球隊一輪適應後，終於知恥近乎勇，近期打出三連勝超級佳作，先於聯賽數賀芬咸七個一皮，之後於歐聯贈巴素利七蛋，上仗作客哈化柏林，打咗一個鐘頭多啲，已贏夠六比○。三場掃廿粒，除巴塞、皇馬之外，呢個世界冇邊隊做得到。


「小豬」是役繼續倦勤已影響唔到球隊，因為洛賓、列貝利、高美斯近三戰包辦十六個入球，呢場面對眼中釘慕遜加柏，佢哋又點會放下屠刀？

拜仁要報雙殺之辱

「青春班」慕遜加柏本季有板有眼，代表作當然係德甲兩循環雙殺拜仁，其中一月中主場出擊，曾一度領先拜仁三粒，最後贏三比一充滿說服力。呢班波專打老虎，上仗作客擊敗利華古遜，超新星馬高列奧斯有士哥，加埋首循環一腳射死拜仁嘅迪甘馬高亦有進帳，今場誰勝誰負就唔知，總之一定多波入！德國盃四強一場過決勝，法定時間內打和，會加時三十分鐘，再和就射十二碼分勝負。