麥馬拿仁創富坊

猪拉多纳

21/03/2012
文： 麥馬拿仁


大細

推介︰海倫芬大


今日有兩場大細中位數調高至3.5球，其中荷蘭盃四強海倫芬主場對燕豪芬，兩軍喺剛過去周日聯賽交手，當時燕豪芬主場大勝五比一，雙方近六次對賽合共炮製廿八個入球，如單計燕豪芬作客海倫芬，近五次亦出現廿二個入球，每場最少入四球，今次係淘汰賽，更有利開大。（周四凌晨3時45分開賽）

首名入球

推介︰卡希爾（愛華頓）


有阿仙奴嘅球賽，大部分人揀「首名入球」，第一個都會先考慮尹佩斯，不過「兵工廠」今仗對手愛華頓主場先後擊敗熱刺、曼城同車路士，故可從愛華頓球員入手。睇番近季成績，卡希爾近四季主場對阿仙奴，有三場都有士哥，相對尹佩斯，卡希爾賠率較吸引，值得一試。（有線301及201台周四凌晨4時直播）

總入球

推介︰拿玻里2、3球

意大利盃四強次回合拿玻里主場對錫耶納，拿玻里首回合作客輸一比二，今場目標清晰，爭取淨勝兩球晉級，主隊要入波之餘，亦要盡量保持不失，可能會贏二比○或三比○，總入球博「2球」 及「3球」。拿玻里歐聯出局、聯賽難望爭標，想捧盃只有靠意盃，戰意必定高。（周四凌晨3時45分開賽）

半全場

推介︰川迪客客

荷甲賽事迪加史卓普主場對川迪，川迪聯賽連盃賽三連敗失九球，為免再畀幾支前列球隊進一步拋離，今次面對弱旅迪加史卓普將全力爭取反彈。現時客勝賠率低至1.21倍，實在冇乜菠菜價值，翻查往績，川迪今季聯賽作客贏過六場，同樣開出半場勝，「客客」值得一試！（now 639周四凌晨1時30分直播）

半場主客和

推介︰城南一和半場勝

中超FC天津上季靠中國足總盃盟主身份取得亞冠盃入場券，內地傳媒都話佢哋係爆冷奪標，可見FC天津喺中超只屬二線球隊，而且佢哋上季作客成績好曳，十五戰二勝九和四負，贏波率低，出到亞洲等劏，今晚亞冠盃G組分組賽作客南韓城南一和好牙煙。一和首戰作客名古屋鯨魚不落下風，有力半場搞掂天津，捧「半場主勝」。（中央5台周三晚6時直播）

單雙

推介︰哥連泰斯雙

南美自由盃F組巴西哥連泰斯主場對墨西哥藍十字，哥連泰斯近期經常開「雙」，當中包括分組賽首循環對藍十字，而更重要係哥連泰斯喺自由盃分組賽無論勝出定係打和，三場比賽都係開「雙」，今場再開都好正路，哥連泰斯「雙」值博。

（有線61及201台周四早上9時直播）

第一隊入球

推介︰李斯特城

英冠黑池主場鬥李斯特城，第一隊入球推介客軍。黑池雖然攻力強橫，但呢班波唔見棺材唔流眼淚，尤其當主場出擊，更周時被對手率先搶得甜頭。翻查近七仗紀錄，就算對手係樸茨茅夫、高雲地利、錫周三等弱旅，黑池竟有六場首先失波。李斯特城碧福特等前鋒大勇，攻力有保證，2.05倍分頭啱胃口。

（周四凌晨4時開賽）

讓球盤

推介︰國際體育會下盤

南美自由盃A組玻利維亞強者主場讓巴西國際體育會平半，主因係佢哋有高原氣候幫助，但要留意強者狀態大跌Watt，上輪作客仲慘吞國體會五蛋，證明兩軍實力有一定差距，今場切勿高估高原因素，難得巴西球隊受讓，捧客軍下盤。

強者兩場自由盃主場全勝，但都欠說服力，包括補時入波贏山度士二比一，對最弱嘅祖安奧列治亦係贏一球，最大問題係強者近五仗只得一和四負，反而國體會愈戰愈勇，三連勝共入十四球，兩隊狀態各走極端，高原因素已不足以成為勝負關鍵。

（周四早上6時45分開賽）