翻生車王強襲曼城

猪拉多纳

21/03/2012
文： 蘇豪

英超是日矚目大戰曼城主場迎擊車路士，曼城今季聯賽主場十四戰全勝，賽績一流，不過球隊在受壓情況下演出明顯走樣，畀死敵曼聯甩開四分後心理壓力更大。車路士改由迪馬堤奧領軍後四戰全勝，車王正式翻生，受讓半一有着數，要下盤！（有線200及300台周四凌晨3時45分直播）


曼城今季聯賽主場十四戰全勝，入四十二球失六球，平均每場入三球，失球更只得個位數字，而且對上七次主場聯賽六場冇失波，攻守並重，單睇戰績無懈可擊！不過，曼城近期處於低潮，聯賽失落榜首地位，再於歐霸盃出局，去到爭冠關鍵時刻跌Watt，反映球隊心理質素唔及曼聯，今次對住當頭起嘅車路士冇必勝把握，加上隊長高柏尼受傷休戰，防線更唔可靠。

費托28歲牛一

車路士辭退保亞斯後順風順水，新教頭迪馬堤奧帶領球隊四戰四勝，包括喺歐聯絕地反擊淘汰拿玻里，主要因為隊中老臣子冇搞事，三大巨頭泰利、林柏特及杜奧巴上場盃賽冇踢，抖足精神打老虎，射手費蘭度托利斯上仗打破入球荒兼起孖，撞啱佢尋日28歲生日，今場隨時再有運行。

曼城受壓跌Watt

車路士現時落後第四位阿仙奴三分，想爭歐聯席位不容再失，大軍傷疲盡起，可夫添出擊；曼城聯賽主場全勝紀錄確實好勁，但之前聯賽主場對熱刺及阿仙奴都係險勝一粒，足總盃主場仲輸埋畀宿敵紅魔，證明有主場之利亦非無敵，還記得曼城聯賽不敗金身正係首循環作客車路士時被打破，今次隨時輪到「主場金身」被破喇！