洛杉磯銀河兵疲 難攻陷華盛頓

猪拉多纳

18/03/2012
文： 查理阿蛋

要應付雙線作戰嘅洛杉磯銀河賽程極頻密，班波未回氣就要踢下一場，搞到近3場正式比賽都未贏過，認真失威！聽朝要喺美職主場鬥華盛頓聯隊未必有着數，小妹寧願捧2.35倍「讓球客勝」，睇好客軍可以全身而退。（開賽時間：周一早上7:00）


上季美職季後賽盟主洛杉磯銀河，為應付中冠盃同美職兩條戰線，短短8日內踢足3場波，最慘係班後備嘅質素又唔夠撐，踢嚟踢去都係嗰班人，你話唔攰就假啦！結果佢哋連輸兩場，包括開咧戰不敵皇家鹽湖城，被打破由上季開始保持嘅美職主場不敗身，之後又喺中冠盃主場輸埋畀FC多倫多。隔唔夠4日，銀河聽朝又要再踢聯賽，小妹真係戥佢哋擔心，讓波唔多樂觀。

前面入埋唔夠後面輸

銀河後防大將奧馬干沙利斯受傷唔踢得，代替佢嘅湯美美亞同保恩斯完全唔夠班，搞到條防線騰騰震，最近3戰場場都至少失2球，就算當路雲同羅比堅尼幾有「卡士」都好，前面入埋都唔夠後面失啦，雖然華盛頓聯隊質素唔及銀河，今場都絕對有力趁主隊回唔切氣成功搶分！