史篤城當利物浦冇到

猪拉多纳

18/03/2012
文： 自由恒

還記得2006年因為趕住收咧迎接世盃，要將4場英格蘭足總盃8強戰安排喺周中進行，隨即受到當地球壇傳統派別炮轟，話咁樣做係唔尊重呢項歷史最悠久嘅盃賽，從此周中踢8強戰成為絕響。今年又撞正大賽年，英超並未有遷就8強戰而停火，今晚同時有聯賽同盃賽上演，認真亂七八糟，球迷千祈咪搞錯。

紅軍入球板斧不足

今晚足總盃尾場直播戲碼有利物浦主場迎戰史篤城，紅軍爭前4幾近無望，捧走聯賽盃之後，當然想做埋盃賽雙冠王，喺上周中默西塞德郡打吡攞完威後，今晚當然想踢埋史篤城出局。雖然佢哋目標明確，不過入球板斧唔多，唔係靠神奇隊長謝拉特創造神迹，就係靠一對中堅嘅頭槌攻勢搶分，可惜其中一名後防猛將丹尼爾艾格就繼續養傷，面對神高神大嘅史篤城防線，絕對唔容易搵到食。


冇錯利物浦係有地利，不過紅軍返到主場並唔係大晒！畢竟季內喺晏菲路嘅勝率不足一半，不敗金身亦於早前被阿仙奴所破。對手史篤城話晒都係上屆足總盃亞軍，歐霸盃出局之後，國內盃賽亦成為佢哋嘅箭頭所指，雖然射手富拿要坐波監，不過倒戈嘅高治可以復出，鋒力有增無減，季內聯賽兩遇利物浦亦都唔使輸，受讓一定要捧3.1倍「讓球客勝」。（now671、672台及廣東體育周一凌晨0:00直播）


足球重心：史篤城（讓球客勝）


馬膽推介：7場J沙貝利


貴為上屆精英碟盟主，近期又跑番上季全盛時間水準，今場絕大部分爭勝對手都曾經跑過香港金盃，唯獨「沙貝利」以逸待勞爭取衞冕，今場讓磅賽負超輕磅可彌補級數上不足。