紐卡素勢擒金絲雀

猪拉多纳

18/03/2012
文： Yennie

雖然呢個星期小妹去咗旅行，但唔代表我冇留意英超消息嘅。我其中一支愛隊「喜鵲」紐卡素，近排狀態稍為回落，搞到爭逐歐洲賽形勢落入下風，不過佢哋今晚喺主場迎戰同樣態沉嘅諾域治，正好係反彈好時機。呢場「雙雀」大戰，小妹支持1.67倍主勝！（有線200及300周一凌晨0:00直播）

近4戰2負輸畀倫敦雙雄

「喜鵲」季初係威係勢，雖未至於有當年舒利亞壓陣咁勁，但能夠重返前列，一度挑戰前4，作為球迷嘅我已經開心不已。當然，限於人腳實力同板櫈深度，紐卡素面對漫長戰事，狀態難免有起伏，近排佢哋連續4場聯賽失分，跌到落英超第6位，落後車仔足足5分，要爭來屆歐戰入場券，一定要盡快重新振作先掂。


不過大家要留意一點，查實「喜鵲」近4場英超係就係2和2負，但佢哋輸嗰兩場係不敵熱刺同阿仙奴，上仗仲要係踢到補時先畀「兵工廠」攻破大門，雖然的確係幾洩氣，但我睇得出佢哋班球員嘅狀態已開始回升。

諾域治態沉近4戰不勝

最重要係我最信賴嘅前鋒黑雙煞之一，柏比斯施斯當日鬥阿仙奴因為戰術問題全場坐冷板，但今晚返主場出戰，佢應該會復任正選，拍住丹巴巴亞同中場賓艾化攻堅，要入波自然冇難度啦！


對家「金絲雀」依家排13位，成績雖然叫做唔錯，但佢哋同「喜鵲」一樣，面對緊狀態回落嘅問題。連埋場足總盃不敵英冠仔李斯特城，諾域治近4戰只得1和3負，衰到貼地，今晚作客出戰，睇怕都難逃一敗。


半隻腳踩咗入o靚模界，但最後決定以學業為重。如今畢業了即捲土重來，希望大家支持。外國波、本地波都係佢「飛佛」。

Yennie推介

紐卡素（勝）

微博傳情 \(^O^)/

啱啱去完泰國華欣旅行返嚟，有我夢寐以求嘅Resort，間房仲有個大露台，真係好relax好舒服呀！呢度勁近海邊，所以有好多海鮮餐廳，景靚不特止，嘢食仲又平又好食添！哈！我最鍾意食嘅虎蝦，同我隻手臂一樣大o架！仲有菠蘿炒飯、生蝦、金邊粉……好，等我努力啲返工搵錢，年尾再去旅行relax吓先！