愛華頓搵黑貓做炮灰

猪拉多纳

17/03/2012
文： 郭球奇

為慶祝執教愛華頓10周年，領隊莫耶斯日前喺打吡戰忍痛收起半隊主力，無非都係想捧英格蘭足總盃。今晚「拖肥糖」喺足總盃8強主場對新特蘭，有番一班主力復出，仲要近年喺葛迪遜恰死「黑貓」，1.73倍主W真係幾抵捧㗎！（now671、672台及廣東體育周六晚8:45直播）


愛華頓領隊莫耶斯喺啱啱禮拜三踏入執教「拖肥糖」10周年，當地官網仲特登將今季所有波衫減至10鎊回饋球迷，球奇都有整番件。不過莫耶斯當日肯定唔開心，事關隊波喺默西塞德郡打吡竟然大敗0:3畀死敵利物浦。


不過愛華頓上場都大犧牲，相比起之前贏熱刺一役，陣容足足有6個變動，當中卡希爾更加連後備都冇，擺明留力今晚對新特蘭。事實上，莫耶斯早前都講過，好希望喺領軍10周年幫愛華頓帶嚟自己上任後首個獎盃，預計今晚出番謝拉域、奧士文、德倫特、卡希爾、菲臘尼維利同希汀加6大主力，就算翼鋒派拿唔符合上陣資格仍然夠殺。

新特蘭兩主力停賽

對家新特蘭近年都好耐冇捧過盃，可惜睇番往績，「黑貓」近年作客葛迪遜公園戰績極曳，對上8次居然只得1和7負，近3場仲要全部食蛋（見下表），加上今場繼續有隊長卡達莫同攻擊中場施斯隆停賽，就算前鋒賓特拿趕及傷愈，都唔似可以幫新特蘭打破宿命。

愛華頓主場專剋黑貓

11/02/26 主勝新特蘭 2:0


10/01/27 主勝新特蘭 2:0

08/12/28 主勝新特蘭 3:0

07/11/24 主勝新特蘭 7:1

06/04/01 主和新特蘭 2:2

05/01/29 主勝新特蘭 3:0

03/01/18 主勝新特蘭 2:1

02/01/12 主勝新特蘭 1:0