愛華頓細保家園

猪拉多纳

17/03/2012
文： 蘇豪

英格蘭足總盃上演八強戰，愛華頓主場對新特蘭，兩軍實力接近，目前於聯賽同分，雙方主帥同屬有料之人，今次高手過招，愛華頓主場五連勝牌面高啲，但「黑貓」專心守波好穩，預期今場緊張刺激而不精彩，士哥唔慌多，捧細！（now 671及672周六晚8時45分直播）




愛華頓剛於打吡戰畀死敵利物浦大炒3比0，不過今次返到主場唔同講法，球隊於主場連下五城，先後贏過曼城、車路士同熱刺，全部保持不失，防守穩健。愛華頓主帥莫耶斯戰術保守，鬥強隊縮埋打突擊可發揮長處，但並不擅於主攻，當遇上同級對手或弱旅往往老鼠拉龜冇碇埋手，今場又會面對呢個問題，讓半一稍嫌多。


對賽績旺細


新特蘭於奧尼爾領軍後防守穩健，除早前作客西布朗被大炒外，好少失準，上場對利物浦完全瓦解對手攻勢，非常硬淨。「黑貓」中場多打仔，格力加特拿、哥爾碧克同占士麥堅恩個個實而不華，將壓迫踢法發揮到淋漓盡致，當然，愛華頓中場魯迪維爾、費蘭尼及史密斯高文亦非常搶得，預期兩隊會於中場鬥到天昏地暗，實際埋門唔會多。




愛華頓球員表明想捧足總盃冠軍賀主帥莫斯耶領軍十周年之喜，必定步步為營，避免有乜差池。翻查往績，兩軍近六次交手五次開細，交投淡靜，今場可留意入球細。