史特加猛火搶「芬」

猪拉多纳

16/03/2012
文： 查理阿蛋

賀芬咸上場對拜仁慘遭大屠殺輸七個一皮，今晚返主場亦唔見得會有太大起色，皆因佢哋近7場喺自己地頭踢嘅聯賽全部和氣收場，今晚迎戰史特加之餘仲要面對「前度」主力射手伊比斯域，大有可能延續對賽不勝紀錄，史特加受讓平半，1.8倍下盤抵博！（有線61及201周六凌晨3:30直播）


賀芬咸頹爆對賽輸條街


賀芬咸話就話今季德甲主場僅得1敗，好似幾硬淨咁，但其實12場入面只係贏過3場，最近7場更加全部握手言和，都算頹得幾緊要！加上兩軍對賽史特加從來佔優，近7次對碰錄得3勝4和，無論主場作客都從未輸過，可以話係食住賀芬咸。加埋主隊上場大敗畀拜仁，踢出嚟一啲火都冇，軍心散渙，今場唔似可以反彈。




賀芬咸想打破對史特加不勝嘅魔咒，今晚仲要過近況大勇嘅「前度」伊比斯域一關！呢位波斯尼亞射手上半季為賀芬咸攻入6個聯賽入球，自今年1月尾過檔史特加後，已經貢獻2個入球同4次助攻，連球會體育總監兼名宿波碧都大讚好波，今次掉轉槍頭大有機會取得倒戈入球o架！


夏歷有傷 岡崎慎司孭飛


伊比斯域話自己喺季中跳船，預咗畀人噓爆，當被問及入波會唔會慶祝，佢就話暫時未決定。慶唔慶祝都好，神射手夏歷有傷，今場未必出得，大有可能要靠伊比斯域同岡崎慎司擔大旗，但係以史特加近5場入17球嘅超強火力，延續對賽威水戰績之餘，隨時可能打破埋賀芬咸嘅主場10戰不敗走勢添！