皇馬讓盤愈辣愈穩陣

猪拉多纳

12/03/2012
文： 水哥

《太陽波經》為讀者搞搞新意思，搵咗小弟阿水同大家搜刮菠菜界秘聞猛料，兼且幫讀者𥄫住早盤走勢，睇睇有乜好料。嚟緊周中又係歐聯大日子，近況大勇嘅皇馬返主場再鬥莫斯科中央陸軍，撞正C朗今期腳風大順，個盤讓得愈辣愈要追！


今期喺班大莊同艇仔口中噏得最多嘅球隊，肯定非皇馬莫屬，皇馬喺巴塞陰影下委屈多年，今季終於吐氣揚眉，喺西甲帶出13分之多。佢哋今季長贏長有係莊家剋星，就算場波踢得幾曳，班賭仔走地再追，最後都梗會開到個救命W。就以昨晨皇馬作客貝迪斯為例，銀河艦隊係先失波一方，一樣憑希古恩入波加埋C朗（左圖紅衫）梅開二度反勝3:2，慶祝主帥莫連奴領軍百戰，班莊家輸走地輸到𠵱嘩鬼叫。

國米小讓平半有暗湧

C朗今場入2粒，終於實現09年轉戰皇馬以來，對戰25支西甲球隊全部取得入波嘅威水紀錄。事實上佢近11場就有10場有「士哥」，嚟緊周中歐聯16強次回合再鬥中央陸軍，莊家開出兩個盤口，讓得少嗰個都已經係2/2.5球，擺明博班賭仔唔敢買，同時亦係睇好皇馬必定可以大炒。計我話今場一於狠啲追個齋2球半上盤，有十足水仲過癮。


仲有國米對馬賽場波，首回合藍黑軍作客輸0:1，今鋪返主場又係非勝不可，但莊家開盤竟然小讓平半咁着數？國米近10場只贏1場，上仗贏基爾禾反彈可能係鋪路今晚食大茶飯，上盤太筍避之則吉。