祖記防線執位熱拿亞有計

猪拉多纳

11/03/2012
文： 朱楓

有時黑起上嚟真係禍不單行！講緊嘅係祖雲達斯，佢哋近況本來已經唔掂，今周仲要有教練停賽兼鬧中堅荒，對住有基拿甸奴復出嘅熱拿亞，絕對冇必勝把握，「讓球主勝」有1.85倍博得過！（now633及660台周日晚10:00直播）


祖雲達斯雖則仲保住聯賽不敗身，但近況明顯跌watt，對上6場聯賽只得1勝5和，點知衰開有條路，今晚作客熱拿亞，仲有教練干地同中堅邦路斯坐波監，加上基亞連尼同巴沙利倦勤，只得番季中加盟嘅馬田卡沙利斯一名中堅可用，據報干地今晚揀無可揀，惟有搵中場維達爾客串中堅。

熱拿亞射手基拿甸奴復出

對家熱拿亞近況仲衰過祖記，對上5場只得2和3負，中堅格蘭基斯啱啱仲因重傷提早收咧，不過好消息係射手基拿甸奴喺上星期二終於傷愈復操，今晚好大機會復出，班主柏斯奧斯賽前仲話有信心說服另一箭頭柏拉斯奧季後留隊，熱拿亞有呢對殺手在陣，試問點會驚群龍無首嘅祖記？