列斯聯搵啱人教翻到身

猪拉多纳

11/03/2012
文： 麥馬拿仁

本地人愛英格蘭足球，傳統「Big4」支持者眾，曼聯粉絲當然最幸福，去年第十九次封王頂級聯賽，講起愛隊分外招積。拿仁捧利物浦，雖然多年無緣英超冠軍，但講到05年歐聯仍鬆毛鬆翼，本屆衰衰哋，都捧走英聯盃。

森林die hard fans難得

球迷分好多類，做glory hunter冇問題，但能與愛隊共患難的，拿仁就真心敬重。周中夜麻麻步出酒吧，猛烈寒風也吹不醒滿身醉意，但老友澄哥仍拎起「埃瘋」check戰果，凌晨爆粗聲音特別嘹亮﹕「X！點搞呀森林，對唐卡士打都輸！米禾爾作客又贏……」


年輕球迷，應不知森林曾屬英倫頂級勁旅，不經不覺，澄哥已捧森林十多年，隨後愛隊跌落英冠、英甲，都一心一意冇見異思遷。現時森林職球員，又點會估到遠在香港仲有die hard fans？

作客無懼米杜士堡

比起森林，香港人應該更掛住列斯聯。當年於基維爾、保耶、拉迪比、碧堤等帶領下，曾昂然殺入歐聯四強，但近年已風光不再。現時列斯聯剛聘得「升班教頭」禾諾克帶隊，今晚英冠作客鬥另一「那些年」球隊米杜士堡不落下風，捧「讓球客勝」。（now 638周日晚8時15分直播）