征史雲斯頻撲 曼城細成騎虎

猪拉多纳

11/03/2012
文： 麥馬拿仁

曼城最近舟車勞頓，上周中造訪葡萄牙踢歐霸，今日就趕到威爾斯作客，優勢未必如想像中明顯。球隊近期作客聯賽鋒芒稍斂，鬥韋根、西布朗、愛華頓等均開細；史軍本季遇強非任人魚肉，今戰捧細。


球季流流長，球隊狀態、表現總有起跌，就算曼城人強馬壯，足夠應付聯賽及歐戰，但一輪衝鋒後必然回落，現時就進入調整期。經過季初遇神殺神後，曼城已成眾矢之的，進攻套路開始被對手洞悉。近七場作客聯賽，曼城僅勝兩仗，當中有六場開出細盤，無論對維拉、愛華頓、韋根、新特蘭、西布朗都係開細。上周中曼城於里斯本輸○比一後，咁快就再戰英超，好可能陷入苦戰。


史雲斯係非一般升班球隊，其充滿信心嘅控球在腳踢法，足以同勁旅周旋，之前同車路士、熱刺、曼聯都開細。事實上，史軍今戰有尼敦戴亞停賽，而曼城後防米卡李察士同尼史葛都能上陣，主隊入波機會不大，今仗捧細啱數。