車仔5條A晒冷 史篤城有難

猪拉多纳

10/03/2012
文： 力奇

換咗新「車手」迪馬堤奧揸弗嘅車路士，今晚擺番昔日「5條煙」A高、林伯、杜奧巴、艾辛同泰利落場，雖然話要有突破成績唔易，但佢哋勝在夾慣夾熟，要大炒二線球隊史篤城絕對唔難，2.02倍「讓球主勝」值得捧場。（有線200、300周六晚11:00直播）


輕取伯明翰食住個勢


畀保亞斯搞到得番半條命嘅車仔，啱啱班主阿布終於決定換帥，暫時搵嚟原本係保亞斯助手嘅迪馬堤奧頂上，後者周中帶隊喺足總盃出征，結果輕鬆贏伯明翰兩蛋。面對住英冠球隊贏波雖然話係應分，但力奇認為呢場勝仗對提升「藍戰士」嘅士氣絕對有幫助。

更令力奇對佢哋投下信心一票，係佢哋5位大哥會齊齊復出。之前唔受保亞斯重用嘅林柏特同艾辛固然可以穩固番中場，上仗輪換休息嘅「魔獸」杜奧巴頂番費托個位，入球自然滾滾來。至於傷愈復出嘅泰利同A高都可以令後防無後顧之憂，就算話馬隆達同迪馬堤奧不和或會被雪藏，相信要贏對手2球依然唔難。


史篤城作客交手4連敗


史篤城呢邊，聯賽2連勝證明狀態唔錯，今仗又可以強陣出擊，難免令人有所期望。不過睇番佢哋近年4次出訪史丹福橋全部輸晒，仲要僅入1球失咗13球之多，擺明畀車仔格食格恰死。最緊要係，車仔家陣要全力搶分爭取重返前4踢歐聯，兼且無論係球員定看守領隊迪馬堤奧都要為飯碗而戰，自然格外搏命，真係勒都勒唔住o架！


橫數千軍


車仔主場例有波入
‧近9次對史篤城得7勝2和。

‧自2011年2月對利物浦後，聯賽主場例有波入。

史篤城頭槌入波最多

‧近24場英超作客波僅贏4場。

‧空戰王37%入球來自頭槌，冠絕英超

猪拉多纳