加拿大打吡白帽無懼「衝擊」

猪拉多纳

10/03/2012
文： 自由恒

美職聽朝開鑼，今季同上季嘅最大分別，除咗香港再冇直播睇之外，就係多咗一隊新軍叫蒙特利爾衝擊，參賽隊數增加至19隊後，每個星期都有一隊要輪空。


衝擊拉雜成軍有排執


蒙特利爾衝擊早於1992年成立，並唔算係新埋班，之前一直角逐較低級別聯賽，上年亦只係取得甲組第7名，今年轉戰美職，當然要嚟個大換血，但由於美職有固有嘅薪酬制度，加上本身並唔係富豪球會，所以都搵唔到星級球員孭飛，較大名氣嘅就只有踢過意甲嘅尼爾遜李華士及費拉利，其餘都只係其他美職球會棄將，完全係拉雜成軍，實力可想而知。睇番之前嘅8場熱身賽，衝擊只係取得2勝3和3負，仲曾經輸過畀今仗對手溫哥華白帽0:3，睇怕都仲有排執。

同樣來自加拿大嘅溫哥華白帽，喺上季先新加入美職，結果做咗包尾大幡，不過佢哋今季搵咗唔少猛將加盟，較為人熟悉嘅除咗南韓國腳李榮杓之外，最值得留意係法國箭頭拿托斯，呢位前費城聯首席射手，上季就射入11球，相信一加盟就可以起到即時作用，有望帶領白帽贏出呢場加拿大打吡。（開賽時間：周日早上7:00）

足球重心：溫哥華白帽（勝）
馬膽推介：3場2 熊英雄

上季勁到可以擊退應屆短途三冠首關盟主「鷹之團」，之後走去遠征，返到嚟又走去增程1400米，先搞到進度受阻，今仗終於捨難取易跑番直路賽，係時候重上正軌