迪馬堤奧揸「老爺車」好牙煙

猪拉多纳

10/03/2012
文： 江忠德

團結就係力量！試問單憑一個領隊嘅能力，點頂得住成班球員嘅一致行動，保亞斯終於畀車路士班老臣子球星夾手夾腳送走咗，依家輪到迪馬堤奧歎吓呢種滋味，處於動盪不安局面嘅「藍戰士」，家陣好難估佢會踢成點？但係入波能力就有限，對住史篤城隨時悶戰一場。

「藍戰士」喺足總盃重賽淘汰伯明翰，上、下半場嘅表現判若兩隊，同一班人踢上半場死氣沉沉，但下半場稍為認真啲就水到渠成，唔通迪馬堤奧真係咁巴閉，喺更衣室講幾句說話就運轉乾坤，機會係有，不過似乎微啲啫。


史篤城鐵桶陣頑抗


其實，擺明又係班陣中大牌球員向呢位看守領隊示威，想場波踢成點樣係由佢哋話事，迪馬堤奧想由保亞斯身邊嘅擦鞋仔，搖身一變做揸弗人邊有咁容易，所以話車路士喺仲剩番兩個月嘅賽季當中，仲有大把好戲睇！

不過，無論車仔呢場戲玩成點樣都好，今季攻力疲弱係事實，加上嚟緊歐聯嘅生死大戰有後顧之憂，兼且史篤城連贏兩場有番晒信心，擺個鐵桶陣都唔易破，球迷要畀多啲耐性等睇入波