車仔大進擊

猪拉多纳

10/03/2012
文： 蘇豪

英超名牌車路士今晚主場迎戰史篤城，車仔看守領隊迪馬堤奧領軍首戰於足總盃贏波，今仗第一次帶隊戰英超，決心交出靚績博取阿布信任。大軍今夏醞釀大地震，眾星為保飯碗會團結一致，但球隊防線始終不穩，面對史篤城空襲難保不失，結合車仔今季聯賽主場逾八成開大，今場捧大！（有線200及300台周六晚11時直播）


迪馬堤奧考牌第二Take


車路士辭退教頭保亞斯後，上場英足盃首度由迪馬堤奧領軍，結果以二比○輕取伯明翰，雖然未完全回復霸氣，但總算有個好開始，最令車迷安慰一幕應屬迪馬堤奧同泰利激情相擁，無論真情定假意，起碼於公開場合粉碎球員唔妥迪帥謊言。除迪馬堤奧要考牌，車仔球員亦需踢爭氣波保住份約，皆因老細阿布表明今夏想換血，相信眾星會將黨派問題擺埋一邊同心作戰。

當然，車路士仍然面對唔少問題，中堅大衞雷斯屬隊中計時炸彈，撇除之前「挺保」立場，此子陣上經常輕出，而且集中力不足，甩漏頗多，絕對信唔過。車仔隊長泰利極速康復，今場可望提前復出，左閘A高亦可候命，防線回復完整，不過，史篤城高空轟炸威力強勁，中鋒高治固然頂得，連守將賀夫及梳爾哥斯喺死球助攻時都極具威脅，車仔未必可保清白之身。


冇得轉彎　冇得U Turn


不過車路士目前身處懸崖邊，除聯賽要努力爭取重返前四外，下周中歐聯背水一戰亦必須擊敗拿玻里方有一線生機，兩邊都冇得留力下，車仔面前得一條路可以行，就係繼續畀油向前衝，冇得轉彎，更加冇得U Turn！睇埋數據，車路士今季聯賽主場十三戰總共開出十一大兩細，大盤率近八成五，今次勢將延續大風，捧大！