上季冠亞軍 強勢搶頭彩

猪拉多纳

09/03/2012


日職開鑼日，焦點當然放在上屆冠亞軍柏雷素爾同名古屋鯨魚身上，衞冕嘅柏雷素爾周日主場鬥橫濱水手，柏軍上周剛捧走日超盃，氣勢如虹，對住實力平平嘅水手，有望贏波先拔頭籌；至於上季亞軍名古屋鯨魚明日率先喺主場迎戰清水心跳，鯨魚今季留住大部分主力，反觀心跳人腳一般，作客惡唔出樣，捧鯨魚旗開得勝！




柏雷素爾上季以穩定表現爆冷奪冠，兩大巴西天王李安度杜明基斯及佐治韋拿級數超高，今季雙雙留隊，加上球隊加碼簽埋巴西箭頭列卡度盧保，即使要兼顧亞冠盃，仍有條件殺入前列。


中村老退 水手唔掂


水手新季主要收購係上季於大地震後離開仙台維加泰嘅巴西前鋒馬昆奴斯，惜另一重心中村俊輔無復當年勇，面對柏軍一班當打球員難搞，上季聯賽水手兩戰全敗，今場仍然無力復仇。（now 633周日下午1時直播）




在名帥史杜高域帶領下，鯨魚前季奪得聯賽冠軍，上季僅屈居柏雷素爾得第二。新球季約舒亞堅尼地、丹尼臣哥度巴及田中鬪莉王等主力仍然在陣，又加入甲府風林巴西中堅丹尼爾施華，成為爭標要角。


人腳一般 心跳勢危


清水心跳上季引入瑞典名將龍格保，可惜雷聲大、雨點小，最終離隊收場，另有守將保斯拿他投，攻守實力皆受削。雖然心跳上季聯賽兩戰鯨魚保持不敗，但今次再遇，恐怕冇咁好彩。