日本職業聯賽周六熱戰開催

猪拉多纳

09/03/2012


受到東日本地震影響打亂備戰，上季日職傳統強隊鹿島鹿角、大阪飛腳同名古屋鯨魚全部出閘脫腳，造就柏雷素爾成為史上首支以升班球隊身份奪取日職冠軍嘅奇迹隊伍。新一季日職明日開鑼，Big3重新上路，一班大牌球星小笠原滿男、遠藤保仁同約舒亞堅尼地，將會同柏雷素爾嘅李安度杜明基斯，爭做日職MVP！


李安度杜明基斯 柏市MVP


柏雷素爾上季神奇奪得日職錦標，又有份參戰世冠盃，成隊波升晒呢。今季佢哋有教練尼仙奴留隊，冠軍班底基本上冇改變，兩大主力田中順也同佐治韋拿都留効，最重要係上季日職MVP李安度杜明基斯最終被球迷感動打消離隊念頭，令球隊爭冧莊增添本錢。




上季李安度杜明基斯連盃賽攻入18球，由於同佢田中順也同佐治韋拿夾到熟晒，相信今季表現會更加好。更何況，柏雷素爾新簽嘅櫪木SC射手列卡度盧保戰鬥力強勁，同樣來自巴西嘅佢，照計可以同李安度杜明基斯輕易建立默契，今季拍住上，肯定大把世界。


約舒亞堅尼地 鯨魚得點王


名古屋鯨魚喺教練史杜高域執教下，前季歷史性奪得聯賽冠軍，上季又後上以亞軍完成球季，當中澳洲中鋒約舒亞堅尼地以19球成為日職「得點王」（神射手），佢嘅空襲已成鯨魚入波方程式，相信佢今季可以踢得更「屈機」，爭取登上MVP寶座。




睇番人腳變動，鯨魚應係今季日職陣容最穩定強隊，只有中堅千代反田充離隊，後防補充番甲府風林後衞丹尼爾施華，防守力不減反增。其餘進攻主力全部留隊，咁嘅陣容，即使兼顧埋亞冠盃仍然夠殺有餘，約舒亞堅尼地唔使場場搏盡，絕對係MVP大熱門。


遠藤保仁 飛腳司令塔


飛腳喺08年捧走亞冠盃後，畀人感覺係兩頭唔到岸，亞冠盃連續3屆16強出局，日職因為分心又攞唔到冠軍，失去咗強隊應有嘅風範。今季佢哋忍痛放走教練西野朗，但新教練施拉奧同樣崇尚進攻，相信佢會將遠藤保仁嘅進攻能力發揮到極限，帶挈佢重生。

08年遠藤保仁當選亞洲足球先生，但由於年紀同傷患問題，近年踢法冇過去咁進取，甚至經常墮後。幸好飛腳今季進行換血，羅致咗甲府風林前鋒保連奴奧利華拉同FC首爾箭頭李昇烈，積極改革鋒線，令遠藤有更多選擇餵波，應可重現昔日司令塔嘅威力。

小笠原滿男 鹿角大腦

鹿角係日職史上最成功球會，計埋上季捧日聯盃，累積15個國內重要錦標，但由於失落亞冠盃入場券，教練奧利華拉選擇離隊，新教頭佐真奴係巴西94年世盃冠軍成員，重視地面進攻，隊長小笠原滿男嘅閱讀球賽能力同超級致命傳送，嚟緊將會大派用場。

今季鹿角放走前鋒田代有三，簽入34歲嘅07年日職神射手祖尼奴，用意係迎合新帥佐真奴嘅戰術，雖然小笠原滿男已經32歲，但佢嘅技術型踢法暫時未見退步，09年仲當選過日職MVP，只要佢能夠同祖尼奴擦出火花，有條件再當選日職最有價值球員。

柏雷素爾 冠軍賠率 6倍

名古屋鯨魚 冠軍賠率 2.6倍

大阪飛腳 冠軍賠率 3.15倍

鹿島鹿角 冠軍賠率 8倍

磐田山葉 冠軍賠率 70倍

橫濱水手 冠軍賠率 28倍

清水心跳 冠軍賠率 100倍

廣島三箭 冠軍賠率 50倍

浦和紅鑽 冠軍賠率 28倍

川崎前鋒 冠軍賠率 28倍

賽制

18隊分主場及作客比賽，雙循環制，勝得3分，和得1分，負得0分；以積分多寡釐定名次。若出現同分情況，將按以下的準則來確定名次： 1.較佳的得失球差　2.較多的得球　3.同分球隊的對賽成績　4.較少的紅黃牌數目　5.抽籤

降班隊數：3隊，排名16、17及18位的球隊自動降班。

參加亞洲聯賽冠軍盃隊數：4隊，聯賽前3名及天皇盃冠軍