紅軍兵工廠爭Big4大廝殺

猪拉多纳

03/03/2012
文： 江忠德

利物浦剛啱捧咗近6年嚟第一個冠軍獎盃，而阿仙奴就喺北倫敦打吡大戰逆轉熱刺，兩隊軍心大振，前鋒狀態又弗到漏油，但防線始終存有漏洞，為爭做「四哥」有前冇後，球迷今晚坐定定睇入球騷啦！




「兵工廠」上季贏唔到聯賽盃，結果呢季就畀「紅軍」捧走，條氣唔頂到上心口就假。其實，呢個盃仔只係利物浦復興大計嘅第一步，最緊要係攞番下屆歐聯入場券！只要有份出現喺歐聯舞台，就可以用重金挖球星加盟提升戰鬥力，依家趁捧盃乘勝追擊，加埋主場效應，可以期待水銀瀉地嘅攻勢。




作為阿仙奴迷，呢季真係要食住鎮定劑睇波，血脈奔騰嘅有贏車路士5:3、布力般流浪7:1、熱刺5:2，睇到眼火爆嘅有慘敗畀曼聯2:8同喺歐聯吞咗AC米蘭4隻光蛋。「兵工廠」一向強調進攻，就係因為唔知個「守」字點寫，先至搞到7年冇冠，如果連歐聯都冇份玩就直頭係災難！呢班小兵，衝勁十足係佢哋嘅無限本錢，之不過，衝動鹵莽就係負資產，一畀對手撩起把火就撳都撳唔住，況且下周歐聯對AC又近乎出線絕望，今晚嚟到晏菲路為保「Big4」地位，肯定會同「紅軍」決一死戰。