阿聯鬼味濃上盤「珀」板

猪拉多纳

01/03/2012
文： 力奇

今日澳職獨腳戲由阿德萊德聯主場對珀斯光輝，咪以為主隊聯賽冇嘢爭就一定放軟手腳，查實佢哋要為嚟緊展開嘅亞冠盃分組賽練兵，鬥志唔會差。最緊要係主隊狀態麻麻兼對賽曳，咁都要讓平半，個盤口鬼味十足，2.05倍上盤抵玩！（有線64及204周四下午5:00直播）


黃金聯被除牌 累跌落包尾


澳職賽會同黃金海岸聯班主吵大鑊，尋日突然宣布取消「黃金聯」牌照，球季餘下4輪點安排未知，但至少本周末嘅「黃金聯」比賽多數改期。隨住「黃金聯」冇得玩，本來排第9嘅阿德萊德聯無情情變咗包尾大幡，不過澳職冇降班制，「阿聯」冇嘢好驚，冇壓力下或有更好發揮。




再者，「阿聯」嚟緊就要出戰亞冠盃分組賽，佢哋近排簽番舊將中堅伊恩費菲，然後賣走米蘭蘇沙克，都係為亞冠盃鋪路。雖則話伊恩費菲今仗未踢得，好彩都仲有比列基迪同安東尼高歷等國腳歸隊，強陣出擊兼有地利，贏波有乜出奇？


珀斯贏往績受讓有景轟


珀斯光輝呢邊，排緊第4，只要保得住前6都有季後賽踢，形勢唔差。更好彩係，佢哋仲有場對「黃金聯」，判贏攞3分機會高，對佢哋更加着數，依家大可打風流波。前鋒史達祖夫斯基飛往中國傾轉會大連阿爾濱，鋒力即時削弱，最離奇係佢哋近3次對賽全勝「阿聯」，居然都會受讓？力奇唔信有咁大隻蛤乸隨街跳，一於拗頸捧主隊。