真假美斯大鬥法 瑞士巴素利兵玩轉阿根廷

猪拉多纳

29/02/2012
文： 查理阿蛋

真假美斯大鬥法！有「瑞士美斯」之稱嘅梳頓沙基利，今晚將率領國家隊主場迎戰以「球王」美斯為核心嘅阿根廷。美斯一踢國家隊就跌watt，未必咬得入硬淨嘅瑞士，小妹睇好瑞士不敗，捧1.9倍「讓主」！（有線61及201周四凌晨3:30直播）




今次瑞士大軍入面有5名球員効力國內勁旅巴素利，呢隊同巴塞一樣着紅藍波衫嘅球隊，先喺歐聯分組賽將曼聯踢出局，再响16強首回合擊退作客嘅拜仁慕尼黑，可以話係「巨人殺手」！其中「瑞士美斯」梳頓沙基利係進攻重心，呢位將於夏季轉投拜仁嘅翼鋒，腳法、速度同射術兼備，今次同美斯鬥法實有一番好戲睇。


阿根廷缺少迪馬利亞


阿根廷近年表現大不如前，即使美斯在陣亦往往缺乏支援，既要喺中場分波，又要負責攻門，搞到一踢國家隊就失威。今季喺皇馬交出13次助攻嘅「西甲助攻王」迪馬利亞更因傷無緣披甲，仲有邊個可以幫到美斯？呢次作客瑞士唔易啃o架。