法國17戰不敗信「德」過

猪拉多纳

29/02/2012
文： 亨格比利

國際熱身賽戰雲密布，今晚就有場極具分量嘅傳統大戰，由德國喺不來梅恭候法國。法國自從改由白蘭斯領軍之後戰績硬淨，已經連續17場國際賽未輸過，3名前線殺手亦在狀態，造訪人腳唔齊嘅德國絕對有得鍊，「讓客」有2.35倍博得過。（無綫翡翠台及中央5台周四凌晨3:45直播）




歐國盃6月殺到埋身，列強都趁機練兵，法國領隊白蘭斯今鋪嚴陣以待，徵召咗艾拉、拿斯尼同列貝利等骨幹入伍，擺明要同德國搏命。其實大軍3名鋒將，近期喺球會都有唔錯嘅演出，好似列貝利就剛啱喺聯賽梅開二度，新紮射手基奧特近期喺蒙彼利埃亦踢到曉飛。


德國唔齊腳試陣居多


不過講到法國最弗嗰件，肯定係自06年11月之後再次為國家披甲嘅沙夏，呢位33歲射手最近過檔熱刺之後已經入咗3球，直情重生一樣，難得一對鋒將賓施馬同雷米都因傷落選，賽前沙夏就話會把握機會，希望用表現打動白蘭斯，爭奪歐國盃大軍一席。




主隊德國係歐國盃奪標大熱，齋睇外圍賽10戰全勝戰績都嚇死人，好可惜隊長拿姆、中場馬里奧葛斯同舒韋恩史迪加因傷落選，啱啱傷愈嘅普多斯基亦冇被納入大軍，前中後三線都唔齊腳。況且領隊勒夫似乎對今仗唔太重視，賽前佢就話會試吓戰術同用新人，講明戰果唔重要，戰意明顯唔及法國。睇番戰績，法國已經連續17場國際賽保持不敗，自1987年以嚟亦都未輸過畀德國，今仗有得砌。