瑞士招呼阿根廷 真假美斯互片！

猪拉多纳

29/02/2012


美斯雖然只得廿四歲，但已被加冕為「新球王」，世界各地自然不斷湧現「新美斯」。聽日凌晨國際熱身賽瑞士主場鬥阿根廷，「瑞士美斯」梳頓沙基利就會同正牌美斯正面交鋒，到時必定好睇過戲！




（有線61及201台周四凌晨3時30分直播）




梳頓沙基利今年只得廿歲，近兩年已被封為明日之星，到本季佢終於全面爆發，帶領國內勁旅巴素利於歐聯分組賽主場擊敗曼聯，去到十六強首回合贏拜仁慕尼黑，梳頓沙基利亦有好表現，佢下季就會以1,000萬歐元轉會拜仁。


梳頓沙基利「瑞士美斯」


美斯於巴塞梗係勁啦，但返到國家隊，演出周時要打七折，相信同心理壓力太大有關。美斯今次要面對梳頓沙基利單挑，一個唔覺意表現被比下去，到時傳媒又有大把話題講喇。




講開巴素利，今年真係威到盡，隨時有機會殺入歐聯八強，陣中多名年輕球員都好有台型，今次瑞士領隊希斯菲特就召入五名巴素利球員壓陣。其中中場史托卡最近炙手可熱，早前贏拜仁一役後備落場踢到曉飛，更轟入奠勝球，未來隨時效法梳頓沙基利，離隊到歐洲大會落班。