巴西出無敵鐵三角贏「波」

猪拉多纳

28/02/2012
文： 力奇

巴西今晚喺瑞士聖加倫同歐洲新勢力波斯尼亞踢熱身賽，「森巴兵團」主帥文奴文尼斯今仗特意重召被視為進軍2014世界盃嘅「無敵鐵三角」朗拿甸奴、尼馬同甘素歸隊，擺到明係谷盡想贏波，力奇睇好佢哋可以延續5連勝氣勢大勝一場，一於捧2.05倍「讓球客勝」啦！（中央5台周三凌晨3:00直播）


由於「森巴兵團」係2014年世界盃主辦國，冇外圍賽要踢，因此嚟緊都要keep住踢熱身賽保持狀態。之前佢哋先後同加蓬及埃及兩支非洲兵團拍跳，結果齋用土炮都接連贏兩場2:0，今次點兵加入埋丹尼爾、馬些路同施薩索拉斯等海外兵團，整體實力肯定如虎添翼。


喺鬥加蓬同埃及之戰，巴西主帥文奴文尼斯都收起咗新星甘素、尼馬，以及前世界足球先生朗拿甸奴，不過今次呢個巴甲鐵三角同時歸隊，進攻組織力自然以幾何級數提升。事實上，文奴文尼斯之前講過，2014世盃巴西係會圍繞佢3個去打造，特別係經驗豐富嘅「細哨」，文帥話明即使佢近況普通，都會繼續重用佢，今次進攻主力卡卡同羅賓奴等都落選，我深信「細哨」一定會交足貨，報答文奴文尼斯。

波斯尼亞轉打442等同送死

波斯尼亞呢邊，之前喺歐國盃附加賽功虧一簣，畀葡萄牙淘汰，雖則話佢哋近年實力進步唔小，但要躋身一線仲差少少。領隊蘇錫今仗賽前話明會變陣，由以往「541」嘅保守踢法改為「442」雙箭頭陣式，目的係畀兩大射手迪斯高同伊比斯域同時落場。不過咪話力奇潑冷水，對住巴西反而改踢進攻波，同自尋死路又有乜分別？後防漏洞增加，睇怕輸少球都難。

橫數千軍

 波斯尼亞防守曳


‧歷來僅1次交手，當時波斯尼亞作客巴西輸0:1。

‧近3戰2和1負，入3球失7球。

 巴西旺入球細

‧近7戰得6勝1和，有6場不失兼開入球細。

‧有8名成員適齡參戰奧運。