皇馬打殘華歷簡奴

猪拉多纳

26/02/2012
文： 走肖

命運要靠自己掌握，由於賓施馬喺歐聯受傷，今晚華歷簡奴喺西甲主場對皇家馬德里嘅打吡戰，如無意外不受重用嘅希古恩會擔正做「銀河艦隊」殺手，依家曼城、車路士同祖雲達斯排住隊想簽佢，下季唔想坐冷板，梗係要打爆華歷簡奴顯身價！正路要1.73倍「讓球客勝」。（now632台周日晚11:00直播）




皇馬喺歐聯作客莫斯科中央陸軍，賽前有翼鋒迪馬利亞再傷，跟手射手賓施馬又喺比賽中打柴，仲話至少要抖3個禮拜，加上臨天光失波被中央陸軍逼和，賽後教練莫連奴嬲到黑晒面，呢場對住同市嘅華歷簡奴，相信佢會吩咐球員打沉對手出番啖氣，唔好忘記，首循環皇馬主場喪贏6:2！


首循環皇馬贏6:2


睇番首循環嘅大勝，當時希古恩都有份入波，今季佢長時間畀賓施馬騎住，如果要大翻身，最實際梗係把握呢段時間入多幾球至得。再講，C朗要同美斯爭做神射手，就算皇馬喺聯賽放甩巴塞10分，都唔怕佢會揸流攤，何況佢哋今日仲要賀比比29歲生日添。


想簽查維馬天尼斯要使4.2億


另據西班牙《機密報》尋晚最新消息，皇馬主帥莫連奴已經同會長皮里茲就下季頭號收購目標，達成一致意見，鎖定畢爾包中場查維馬天尼斯。不過，由於畢爾包暫時未有放人嘅意思，「銀河艦隊」或要畀4,000萬歐元（約4.2億港元）先可以買斷合約。




對手華歷簡奴今季表現其實唔曳，依家排喺中游位置可以話有晒交代。之不過今季華歷簡奴除咗試過畀皇馬玩殘之外，首循環作客巴塞亦淨吞4蛋，反映出佢哋對住超班對手係完全冇得揮。