利記決心破死守 捧盃煲靚粥

猪拉多纳

26/02/2012
文： 查理阿蛋

雖然聯賽盃喺好多球迷眼中只係「盃仔」，但對於餓咗足足6年嘅利物浦嚟講，呢個冠軍又點可以錯過？事隔16年，紅軍終於再踏溫布萊球場，對手英冠球隊卡迪夫城必定想死守博和波，希望捱到喺12碼大戰搵機會。但小妹相信利物浦憑質素同決心仍然可以小勝奪冠，一於冷敲3.5倍「讓和」啦！（now 631及638台周一凌晨0:00直播）




諗番上年聯賽盃決賽阿仙奴倒灶輸畀伯明翰，就知利物浦今晚唔係贏硬！雖然卡迪夫城近況相當沉吓，近5場只得1勝兼失咗10球，但係呢隻「藍鳥」從未贏過聯賽盃，賽前亦被看得極淡，冇壓力之下分分鐘有較佳發揮㗎！小妹預料佢哋喺法定時間會以防務為主，希望可以喺加時或者互射12碼偷雞成功，紅軍要取得入球，必定要花一番工夫。


卡迪夫城近況曳


好彩嘅係，利物浦喺晉級之路連斬史篤城、車路士及曼城，幾經辛苦先殺入決賽，嚟到最後一關又點會輕視卡迪夫城？而且陣中唔少球員都未嘗捧盃滋味，經驗老到嘅謝拉特、加歷查及連拿等人亦經歷咗6年錦標荒，恨咗咁耐，今場為奪冠當然去到盡，鬥心之強絕對唔需要懷疑。




賽前紅軍亦傳出好消息，領隊杜格利殊話上仗避戰嘅中堅丹尼爾艾格可以上陣，佢同史卡迪爾呢對「紋身孖寶」今季演出可人，令利物浦喺英超嘅失球數字僅多於曼城列聯賽第2，卡迪夫城要守住城池已經難，想攻陷呢道「紅牆」更加係妙想天開！


利物浦「紅牆」英超第二穩


深得卡迪夫城球迷歡心嘅比拿美亦會復出，倒戈嘅佢憑速度及技術，絕對令「藍鳥」防線風聲鶴唳，加埋屢次領軍捧盃嘅「神奇隊長」謝拉特及一落場就着晒火嘅蘇亞雷斯，就算紅軍今季把握力有幾差，要喺90分鐘內贏1球絕對冇問題，一於捧夠晒好分嘅「讓球和」啦！