車仔專煲魚生粥餵保頓

猪拉多纳

25/02/2012
文： 郭球奇

近況沉到爆嘅車路士，今晚返英超主場對保頓，老實講的確幾惡啃，不過「藍戰士」質素始終高啲，難得對住「私房菜」保頓，球奇相信保亞斯一定會諗盡辦法攞3分保帥位，讓一球不妨冷敲3.8倍「讓球和」！（有線200及300、廣東體育周六晚11:00直播）




車路士喺歐聯16強首回合作客不敵拿玻里後，已累積5場不勝，有傳領隊保亞斯仲同林柏特等3位老將鬧不和，傳聞可能轉教國米，艾殊利高爾仲計劃離隊添。後衞伊雲洛域賽前接受訪問嗰陣，都承認車仔身處危機，但就相信只要團結，一定可以走出谷底。


費托落選西班牙大軍


事實上，車仔本身人腳唔錯，雖然泰利要抖一排，但仲有加利卡希爾頂替；日前對拿玻里手指骨折嘅桑馬達，應該可以紮住上陣，賽前呢位車仔最弗鋒將，都幫保亞斯同其他隊友打打氣：「我對車路士好有信心，我哋未死o架！雖然依家處境係差啲，但我覺得我哋一定可以扭轉乾坤。」桑馬達就信心十足，不過佢嘅隊友費蘭度托利斯就慘，佢喺剛公布嘅西班牙大軍名單上榜上無名，亦係佢近5年來首次冇病冇痛而落選。


保頓聯賽表現遠遜盃賽


保頓上周喺足總盃淘汰米禾爾晉級8強，借將宮市亮仲勁搶鏡，傳聞即將晉升日本大國腳，可惜喺聯賽就持續低迷，自1月尾贏過紅軍後，近3場英超得1和2負，主場仲鴉敵護級勁敵韋根，跌到落尾二。鬼咩！保頓傷兵名單水蛇春咁長，足足達9件，近幾年作客車仔亦輸多贏少，唯一安慰係近3次聯賽作客「藍戰士」都以1球僅敗，車仔近期贏親又係僅熟（見附表），今晚就算再出現呢個戰果，相信保頓fans都收貨！