昆士柏 退熱現真身

猪拉多纳

25/02/2012
文： SAMVO肥叔

英超榜尾形勢都幾清晰，五支弱旅被甩開，其中昆士柏流浪今輪主場對富咸，昆士柏季中收購唔少高質兵，本身人腳唔曳，近期球隊戰績麻麻，依家已經退晒熱，今仗有機會止跌回升，平手盤絕對捧得過！




（有線203及303台周六晚11時直播）




昆士柏流浪季中引入多位球員，施斯、森莫亞同奧奴夏等人都有分量，增兵後戰績冇乜改善，梗係啦，球員唔係機器，佢哋需要時間磨合同建立默契，你估真係即買即掂咩！昆士柏近期頻頻失分，換來理想盤口，今次主場出戰富咸，大部分莊家開緊平手盤，雖然前鋒施斯停賽，不過富咸排中游護級壓力唔大，加上本身作客曳，惡唔出樣！


禾夫斯堡主場起筷


跟住再睇場德甲，禾夫斯堡主場對賀芬咸，禾堡上次作客史浩克輸得難睇，不過，通行都知呢班波作客例牌腳軟，於德甲客場評級唔高，但返到主場完全係兩回事，佢哋主場發揮穩定，對住同級球隊搏殺好少失手，有時對強隊都頂得住，今次遇上賀芬咸，讓半球盤口合理，又係起筷時候！




另外，英超名牌球隊車路士近況好曳，但仍然未有退熱，今晚主場對住保頓要大幅讓波，上盤唔多抵玩。「車仔」依家谷埋一肚氣，一係唔贏，一贏隨時大炒對手，捧大盤好過。