曼城又一力作

猪拉多纳

25/02/2012
文： 蘇豪

英超一哥曼城今輪主場撲擊下游分子布力般流浪，曼城聯賽主場全勝，士哥數字冠絕各隊，霸氣十足。布力般聯賽客場失波數字屬英超最高，冇咗大將基斯杜化森巴後防弱不禁風，今次仲有中後場主力基維及積遜路維停賽，頂唔住對手，曼城「讓球主客和」讓二球照捧「讓球主勝」，而大細中位數調高至3.5球亦照捧大盤！（有線200及300台周日凌晨1時30分直播）




曼城今季聯賽主場戰績完美無瑕，十二戰全勝轟入三十七球，場均入球超過三球，火力超強。大軍前線現時齊晒腳，射手阿古路同迪斯高上場歐霸盃對波圖都有士哥，仲有個神經刀巴洛迪利在陣，選擇極多。與此同時，中場「雙大衞」大衞施華及大衞比沙路狀態大勇，兩個指揮官同樣擅長分波同埋門，攻擊點分得夠散，一般等閒之輩好難頂得住。


布力般作客失波王


布力般流浪今季作客發揮曳，防線表現尤其唔掂，早前客場對阿仙奴曾大敗一比七，非常難睇！截至目前為止，布力般聯賽作客十二戰失三十球，數字屬英超最高。自從棄用防線支柱基斯杜化森巴後，大軍防守力弱上加弱，一對中堅史葛丹恩及格蘭漢尼級數麻麻，今戰仲有中後場主力基維及積遜路維雙雙停賽，可謂雪上加霜。




曼城現時於聯賽領先死敵曼聯兩分，為保住榜首位置，一分都不能少，以球隊今季無敵主場戰績，今場贏波唔成問題，但主勝冇肉食欠菠菜價值，考慮到曼城今季聯賽主場對次級球隊史雲斯、韋根、阿士東維拉、諾域治、史篤城及富咸等同樣贏三球或以上，讓球主客和「-2」照捧「讓球主勝」，基於布力般防線曳得交關，捧大亦佳！