慕遜加柏強勢大啖吞漢堡

猪拉多纳

24/02/2012
文： 朱楓

今季德甲認真刺激，尤其係睇前列4隊你追我趕非常過癮，當中朱楓最鍾意就係慕遜加柏，踢法流暢到暈，喺主場出擊仲特別醒神，今晚對住防守勁差嘅漢堡，要再下一城開1.63倍主W話咁易啦！（有線61及201周六凌晨3:30直播）




假如你覺得慕遜加柏上半季咁勁係符碌，咁睇埋佢哋歇冬後嘅表現，相信會另眼相看，皆因呢支老牌勁旅踏入1月後未輸過不特止，仲先後喺主場大炒拜仁同史浩克04兩支爭標勁敵。事實上，慕遜加柏今季喺自己地頭出擊勁醒，11戰得8勝3和。雖然中堅丹迪近日盛傳下季會以460萬歐元轉會費過檔拜仁，但中場馬高列奧斯早前咪又係一早落實季尾加盟多蒙特，但至今表現依然咁Sharp醒，影響根本有限。


歇冬後不敗傷疲盡起


賽前慕遜加柏官網更稱，喺上場贏凱沙羅頓一戰受傷嘅中場洛特維迪、贊迪斯基同後衞達姆斯都已經冇事，中場托賓麥斯同後衞史蘭斯亦已復操，就連早輪傷風嘅漢基都好番晒，只得右翼靴爾文啱啱做完手術要抖8個禮拜缺陣，基本上可以話傷疲盡起，強勢出擊搶分。




另邊廂嘅漢堡早前換上前拜仁名將芬克執教後，成績明顯好轉，難怪獲阿聯酋航空贊助多3年，可惜礙於本身人腳實力有限，特別係條防線只要對住啲攻力強少少嘅球隊就好易崩潰，好似上周打吡戰主場以1:3不敵雲達不來梅，賽後芬克亦承認技不如人，今晚即使有守將謝菲布馬傷愈復出，睇怕都係凶多吉少！