紅魔二線兵 歐霸做大「士」

猪拉多纳

23/02/2012
文： 力奇

紅魔歐霸起風雲！由歐聯降格轉戰歐霸盃嘅曼聯，喺32強首回合作客輕取阿積士2粒，今晚佢哋喺次回合返到奧脫福迎戰陣容天殘地缺嘅阿積士，贏實力加地利，要再下一城唔難。最緊要係紅魔一班小將同二線兵都要搏命爭上位，贏少粒都唔制，1.8倍「讓球主勝」抵捧。（有線61及201周五凌晨4:05直播）




「紅魔鬼」本來被視為歐聯奪標熱門之一，點知意外喺分組賽出局，家陣淪落嚟踢歐霸盃，講到底，實力肯定係大超班。首回合佢哋作客阿積士都輕易贏波，今次返到主場出擊，就連壓力都冇乜，加上為咗留力2日後嘅英超鬥諾域治場波，消息話朗尼同里奧費迪南等主力，今晚都只係會做啦啦隊。


後備新星爭上位戰意可靠


不過，以為呢隊「二線紅魔」會好「恰」咩？咁就大錯特錯喇！事關領隊費格遜預計派出嘅陣容，係會有爭取重返正選行列嘅貝碧托夫、爭緊上位嘅法比奧達施華、湯卡華利同菲爾鍾斯等人，至於獲得多間大球會垂青嘅超級新星保羅普巴，今晚亦有望取代卡域克正選登場「騷哥利」，個個落場都話要搏命，要贏兩球或以上話咁易啦！


阿積士態沉 傷兵一大籮


阿積士呢邊，上輪聯賽大炒奈梅亨算係爭番口氣，不過以佢哋班波歇冬後4戰只得1勝3負嘅差劣狀態去睇，今晚憑乜去頂住曼聯吖？再者，佢哋大軍張傷兵名單水蛇春咁長，包括前鋒史基賀臣、中場艾安安奧、保爾列達、守將保利臣、雲達韋爾同奧查等主力都話唔出得，殘陣作客，擺明等死啦！