紅軍強捕海鷗

猪拉多纳

19/02/2012
文： 蘇豪

英格蘭足總盃第五圈十六強，英超名牌球隊利物浦主場迎戰英冠「海鷗」白禮頓，「紅軍」恨做雙料盃賽冠軍，踢埋今場仲有一周時間備戰英聯盃決賽，根本唔使留力。白禮頓近十戰不敗，但對手唔同級數，今次越級挑戰無力爆冷，分分鐘畀人大炒，博「讓球主勝」！（now 671及672周一凌晨零時30分直播）




利物浦今季聯賽主場十二戰只贏四場，勝出率偏低，而且遇弱愈弱，唔少朋友擔心球隊咬唔入白禮頓。不過，踢聯賽同盃賽係兩回事，「紅軍」喺英足盃第四圈踢走死敵曼聯，同時於英聯盃四強殺敗英超一哥曼城，表現虎虎生威。利物浦下周會出戰英聯盃決賽，距離今仗足足有一星期，備戰時間充裕，完全唔使擔心球隊有後顧。




利物浦現時人腳完整，除中場盧卡斯長抖外，其餘主力都可候命，麥斯洛迪古斯傷愈，中前場又多個殺手，前線安祖卡路爾急需爭取士哥證明自己，蘇亞雷斯於「握手門」事件後谷埋一肚氣，兩人同樣有火，今次遇上次級球隊，絕對唔會留手。




況且「紅軍」尚有比拿美及達寧等人調配，個個都要爭取表現，鬥志鮮明。


白禮頓越級唔夠料爆


白禮頓位處英格蘭東南部沿海地區，故有「海鷗」之名，球隊踏入二○一二年表現大勇，對上十戰未嘗一敗，但對手實力唔算好強，最叻係上圈於主場淘汰紐卡素，今次去到晏菲路球場肯定難踢好多。白禮頓西班牙球星維辛迪受傷未必踢得，前線威脅力減，球隊於今屆英聯盃第三圈主場對利物浦都輸一比二，今次作客惡唔出樣。