拜仁擦餐飽壯行色

猪拉多纳

18/02/2012
文： 蘇斯黑柴

今晚德甲壓軸戲弗賴堡主場鬥拜仁慕尼黑，拜仁踢完今仗將步入魔鬼賽程，不過佢哋對此已習以為常，球隊過去硬仗前對弗賴堡一樣開大餐，完全唔使留力，今晚情況唔會改變，「讓球客勝」可視為過關重心。




（有線61及201台周日凌晨1時30分直播）




拜仁一向最鍾意遇上弗賴堡，因為幾時都係話贏就贏完全冇懸念，自2001年至今，雙方近13次交鋒全由拜仁勝出，得失球差係39:6，期間更開出過３次其他贏波膽，往績絕對一面倒。




拜仁未來賽程緊密，下周中要喺歐聯作客瑞士鬥巴素利，然後要硬撼聯賽兩支四強分子史浩克04同慕遜加柏，不過拜仁踢得密係家常便飯，佢哋近三季都試過出征歐聯前對弗賴堡，前季作客波爾多、上季作客克盧日同今季作客維拉利爾前，拜仁一樣照贏弗賴堡，其中今季出征西班牙之前仲炒夠7:0，證明弗賴堡只係拜仁嘅餐前小菜一碟，一於照擦可也。


收起洛賓更流暢


拜仁目前喺聯賽落後多蒙特兩分，當然希望趁歐聯重開前追得就追，以近兩仗演出所見，老帥軒歷基斯將踢法自私嘅洛賓擺喺副選係明智決定，球隊進攻節奏更流暢，今仗面對中、後場人腳不整，防守力又係全德國最差嘅包尾大幡弗賴堡，炒三幾粒根本唔係難事。