巨人殺手布爾格作客照撐

猪拉多纳

15/02/2012
文： 自由恒

近年次級聯賽球隊經常喺盃賽攪亂檔，英冠嘅卡迪夫城就殺入今屆英聯盃決賽，至於法國足總盃方面，對上5屆都有低組別球隊入4強，乙組仔甘岡更曾於2009年封王，到今屆16強亦有6隊非甲組隊出現，仲坐底有兩隊會躋身8強。




至於今晚上演嘅兩場16強補賽，喺早場亮相嘅布爾格就來自第4級聯賽，今晚硬撼法甲嘅馬賽，我就撐4.6倍「讓球客勝」，話晒近13場比賽都未輸過，上一圈更淘汰甲組嘅阿些斯奧，唔可以睇少。


馬賽難應付4條戰線


本來今戰安排喺中立場聖伊天舉行，但由於預測當地會有風雪，擔心賽事再次延期，決定改喺馬賽主場作賽，足智彩為免誤會，索性安排新球賽編號（三）11畀呢場波。馬賽突然佔到地利，睇落好似幾着數，但上圈主場對住乙組仔勒哈弗爾都贏唔到，就知今仗唔易打。事實上佢哋除咗足總盃之外，法聯盃同埋歐聯都未出局，計埋聯賽要4線發展，都咪話唔惡啃，雖然阿休兄弟已經喺尋日報到，但呢兩位加納國腳喺今屆非國盃踢到殘晒，返到嚟都未必幫到手。（開賽時間：周四凌晨0:00）