辛尼特雪僵賓菲加南美兵

猪拉多纳

15/02/2012
文： 走肖

今晚歐聯16強首回合有頭場上演，由俄羅斯冠軍辛尼特主場迎戰葡萄牙班霸賓菲加，雖則主隊傷兵滿營，但天氣預報話俄羅斯聖彼得堡今日最凍得零下13度，單係天氣因素足以制敵，就算賓菲加連贏11場又有得受讓平半，都咪以為有筍盤呀！（有線61、64、201、204及中央5台周四凌晨1:00直播）




現時辛尼特有前鋒布卡洛夫、中場丹尼艾維斯、舒洛哥夫、安約高夫養傷、後衞基斯薛圖食物中毒發燒，不過辛尼特自上年12月完成歐聯分組賽，至今未有正式賽事，史巴列堤大把時間備戰，相信呢位曾經帶領羅馬稱霸意甲嘅教頭，有辦法可以克服傷兵問題。


賓菲加中場查維加西亞長抖


或者你會覺得久疏戰陣嘅辛尼特狀態冇保證，不過睇完天氣預報，睇怕你唔會咁擔心，因為聖彼得堡早兩日攝氏-20度，今日就介乎-12至-13度，根本唔係一般球員可以適應嘅比賽環境，就算辛尼特班人未完全操起比賽狀態，照計踢落都會順過賓菲加好多，有條件傷兵多照贏。




家陣賓菲加喺葡超領前次席嘅波圖5分，有條件兼顧歐聯戰線，弊在賓菲加有大棚南美兵，特別係巴拉圭射手奧斯卡卡度素、阿根廷中場艾馬同巴西中堅安達臣雷沙奧唔習慣，實聽凍僵，加上中場查維加西亞重傷長抖，連贏11場走勢隨時被打斷。