意甲靠晒歐聯翻本

猪拉多纳

15/02/2012
文： Mic少

意甲及英超標誌歐洲足球兩個時代變遷，八十至九十年代中，意甲被稱為「迷你世界盃」，聯賽水準屬於全球最高，意甲球會往往係歐洲賽奪標熱門。不過近十多年，英超盛世取代意甲，成為世界第一聯賽，今屆歐聯十六強出現兩個英意對決組合，成為意甲為自己正名嘅良機。


市場遭英超蠶食


意甲衰落好大程度上歸咎於球會本身經營不善，無力再重金收購球星，導致球迷及贊助流失，影響收入，造成惡性循環。加上受假波、球迷暴力問題打擊，意甲個「朵」愈來愈臭，球隊喺歐洲賽成績亦每況愈下，歐洲足協系數排名已跌至第四位，下屆歐聯意甲只得三個席位，甚至可能被法甲及葡超過頭，冇面之餘，仲導致龐大歐洲賽收入損失。




難得今屆歐聯有三支意甲兵團打入十六強，仲多過英超，加上阿仙奴及車路士今季演出都未如理想，如果AC米蘭及拿玻里能夠將倫敦雙雄一舉擊倒，不但可令球會繼續發歐聯財，亦對意甲有莫大益處。