魯賓卡山1.85倍W速食

猪拉多纳

14/02/2012
文： 樂比堅尼

歐霸32強首回合今晚先上演兩場賽事，頭場俄羅斯魯賓卡山主場對希臘奧林比亞高斯，樂比仔睇好魯賓卡山。莫斯科近日氣溫約零下二十度，同希臘溫差足足成三十幾度，奧林比亞高斯班球員隨時凍到僵，樂比仔捧熱辣辣嘅1.85倍主勝！作為告別大家嘅推介。




樂比仔一向認為俄羅斯球隊係山寨王，其他球隊山長水遠嚟到，要重新適應時差、天氣甚至場地，作客表現難免會打折扣。睇番魯賓卡山嘅歐洲賽主場成績，近五仗保持不敗，取得三勝二和，記得○九年歐聯分組賽，魯賓卡山面對國際米蘭、巴塞隆拿等強敵依然毫無懼色，可見魯賓卡山主場一啲都唔簡單。


魯軍西班牙集訓谷狀態


事實上，魯賓卡山備戰今次歐霸相當積極，早前拉隊到西班牙集訓，踢咗多場高質量嘅熱身賽，仲贏得馬爾韋利亞盃，狀態相當勇銳，加上今季俄超改制延長球季，踢完常規賽之後再踢附加賽，魯賓卡山仍處於季中，狀態一定比以往好。




其實奧林比亞高斯同樣係地頭蟲，主場表現遠比作客好，佢哋已經超過四十年未曾喺歐洲賽與俄羅斯球隊交手，加上今仗要喺人造草場比賽，球員適應更加困難，樂比仔以魯賓卡山主Ｗ作為暫別《東方波經》推介，來日有機會再同大家見面。