壯士斷臂巴塞有救

猪拉多纳

14/02/2012
文： 黃興桂

如果話巴塞隆拿係近年歐洲各地聯賽之中水準最高、表現最穩定球隊，相信冇咩球迷會反對，不過地上最強都有倒下時，巴塞上周末慘負奧沙辛拿二比三，聯賽榜已經落後皇馬十分，以皇馬教練莫連奴功力，哥迪奧拿深知要後來居上難度極高，相信餘下賽季會集中精神角逐歐聯及西班牙盃。


放棄西甲 釋放壓力


巴塞走勢下滑主要有兩大原因，首先係好多球隊都要面對嘅傷兵問題，前鋒韋拿及中場恩尼斯達先後受傷，當中後者缺陣大大加重了另一中場沙維負擔，同時亦削弱了對美斯嘅支援，令美斯演出受到影響。另一個原因係球員飢渴感不足，巴塞近年橫掃球壇贏盡所有榮譽，落到球場難免會欠缺了爭勝動力。巴塞依家好似一個充滿氣嘅皮球，愈谷愈大，始終會有爆煲一日，如果哥帥懂得放氣，相信只會百利而無一害，所以失落聯賽對佢哋嚟講未必係壞事。




巴塞係當今世上擁有最多好球員、隊型最好嘅球隊，只要球員保持爭勝心，踢一場過或兩回合淘汰制賽事，甚少球隊能夠與之匹敵，強如皇馬、曼聯近年對佢哋都係輸多贏少便是好例子。今晚巴塞於歐聯十六強首回合作客鬥德國利華古遜，利華自知實力不及對手，就算有主場之利亦唔會貿貿然搶攻，巴塞大可睇定嚟食，客W賠率唔吸引，揀入球細更佳。




金句：地上最強的選擇