今晚做利華啦啦隊

猪拉多纳

14/02/2012
文： Wendy

前幾日有篇報道話，朗尼除咗植髮外，仲偷偷地整埋容，有網民上載咗「事前」「事後」嘅相做對照，我就覺得分別唔大，可能我入行後見過太多「整前」「整後」，所以係真係假我一眼就睇穿。以佢呢種輪廓，要整到變靚仔要好大工程o架，咁不如專心踢波好過啦。




我就話鍾意一個人，唔只睇表面，應該感覺吓佢係咪對你真心，唔係今日係情人節我至咁講，你嘅情人喺你眼中，應該係日日好似西施咁靚至真。




今晚情人節壓軸節目，就係返工做利華古遜對巴塞隆拿呢場歐聯大戰。就算「地上最強」啱啱先喺聯賽爆大冷輸畀奧沙辛拿，大家都會認為係巴塞一時失手啫，今晚咪照大炒利華。




不過我覺得利華都有機會起碼守和，原因有三：防守有改善，上場對多蒙特只係僅輸○比一，但穩守突擊踢法有進步。當然多蒙特難同巴塞相比，但利華嘅防務工夫若果能夠保持上場狀態，今晚應該唔使輸到杰撻撻。第二：難得意外地殺到入十六強，利華班球員一定搏晒命，相對巴塞班兵，入咗十六強、之後晉級再晉級，心態上有啲奉旨，輕敵隨時會令佢哋出事。三：假如巴塞仲未放棄西甲聯賽錦標，下一場主場對華倫先係硬仗，呢場有機會唔去盡。我呢就已經小注買咗利華，就算爆出嘅機會幾低都好，都係嗰句：「波係圓嘅！」